| Escomencipian los cursos de Llingua Llïonesa en La Bañeza |
|
Una vuelta más y en collaboración cul Ayuntamientu de La Bañeza, l'Asociación de la Llingua Llïonesa El Fueyu entama pur tercer añu consecutivo los cursos de llïonés n'esti conceyu.
Las clases, qu'escomencipiarán el martes, noviembre y 25, sedrán impartidas nel Centru Cultural Infanta Cristina pul profesor Xuasús González n'horariu de 19,00 a 20,30 h. en segundu nivel y de 20,30 a 22,00 h. en primeiru.
El preciu del cursu ye de 20 € y los interesaos na iscrición han dirixise al Ayuntamientu de La Bañeza ou a la Biblioteca Municipal pa recoyela.
Más información nos teléfonos 620 051 566 y 699 701 707.
|
| El llïonés cunta yá esti añu cun 200 presonas deprendiéndulu |
|
El conceyeiru d'Educación y Cultura Llïonesa del Conceyu de Llión, Abel Pardo Fernández, ofrecéu una rueda prensa na que díu deillos datos sobru l'ensiñu del llïonés tantu na estaya d'adultos cumu en niños.
Na estaya d'ensiñu p'adultos, el númberu matriculaos chega esti añu a más del centenar, siendu 53 las presonas qu'escomencipian clas esti añu pur primeira vuelta, superandu asín ampliamente las cifras del añu pasáu, lu que, en palabras de Pardo "ye un nidiu casu de la demanda pur parte los llïoneses". Estos cursos de llïonés tán dividíos en 6 estayas, tal y cumu determina la normativa europea sobru ensiñu d'idiomas, de las cuales agora mesmu tán ufiertánduse 5 d'eillas.
Nel ensiñu a niños cumu autividá estrascolar, da escomienzu precisamente guei, algamánduse chegar al 80% del alunáu total de niños na ciudá. Sigún los datos del conceyeiru, hai confirmadas 80 matrículas, lu que supón un 20% del total de niños. Estos númberos superan amplísimamente la del cursu pasáu nel que s'ufiertóu pur primeira vuelta l'autividá en dous centros.
"Venimos a cubrir una necesidá rïal ente la sociedá llïonesa, que lu acueye cun gran satisfaición y miyor respuesta", aseguróu Abel Pardo
|
Yá son cuasi un cientu los escolines apuntaos a l'autividá estraescolar de
llingua llïonesa
nos 15 colexos de la ciudá de Llión que la impartirán |
|
La Conceyería d'Educación del Conceyu de Llión diou nuncia'l pasáu mes de setiembre de qu'anantaría esti añu la ufierta de llingua llïonesa a tolos colexos de la capital y dica guei los resultaos nun pueden sere más positivos. Ya son cuasi un cientu niños los que participarán na autividá nel presente cursu.
El conceyeiru responsable de la estaya, Abel Pardo, informóu de qu'esti datu vien a confirmare la fuerte demanda social acerca de la nuesa llingua qu'esiste ente la ciudadanía y apuntóu que n'esta autividá, empobinada a escolines de quintu y sestu de primaría y que supón un 20% de la demanda total d'autividaes estraescolares, tamién participarán alunos de terceiru y cuartu pues deillos colexos dienun nuncia de que n'esos niveles tamién hai voluntá de participación.
Dende la nuesa asociación queremos amosare la nuesa satisfaición pur esta niciativa y afalar al Conceyeiru d'Educación del Conceyu de Llión a sigire trabayandu n'esi sen pula nuesa llingua.
|
La conceyería de Cultura Llïonesa abre las matrículas de llingua llïonesa
pa esti añu |
|
La Conceyería de Cultura Llïonesa del Conceyu de Llión, dirixida pul llïonesista Abel Pardo, abre'l periodu de matriculación de los cursos de llingua llïonesa. A partire guei pueden pasase pula sede la Conceyería, afincada nel Palaciu Don Gutierre (Plaza Don Gutierre, 2) na ciudá de Llión. El preciu la matrícula son 10€ pa empadronaos nel Conceyu de Llión y 20 pa los non empadronaos.
Pa más información chamen al 987 344 370 
|
| La Conceyería d'Educación ananta'l llïonés a tolas escuelas del conceyu |
|
Tras l'ésitu la esperiencia pilotu del cursu pasáu que superóu tolas espeutativas cun dous centros y 26 alunos, la Conceyería d'Eduación del Conceyu de Llión, dirixida pul llïonesista Abel Pardo Fernández, medra la sua ufierta de clases de llingua llïonesa cumu asinatura estrascolar a tolos centros educativos de la ciudá nún esfoutu ensin precedencias, cuntandu yá cun cuatru monitores de llïonés, toos diplomaos en maxisteriu y cun esperiencia docente previa.
En palabras de Pardo "estas clases cumplen los oxetivos del pautu UPL-PSOE, l'Estatutu de Castiella y Llión sobru la defensa del llïonés, con la Unesco y la Declaración de Dreichos Llinguísticos sobru promoción y esporpoye del llïonés al traviés de las cadarmas públicas".
Dientru del programa la materia de llïonés daranse más aspeutos rellacionaos cuna cultura llïonesa: dende l'arquiteutura tradicional a la música, pasandu pulas tradiciones agrarias, animales o la hestoria del Reinu de Llión.
|
| Leonoticias.com tamién espubliza nuevas en llïonés |
|
El periódicu dixital leonoticias.com espubliza pur primeira vuelta una nueva íntegramente en llingua llïonesa. Cun esti xeitu leonoticias.com súmase a outros medios de comunicación llïoneses que vienen espublizandu las nuevas, tantu de temática alrodiu'l llïonés cumu outras temas, na nuesa llingua.
Dende eiquí, la nuesa más sinceira norabona pur talu xeitu, esperandu que se repita más veces nel tiempu.
Enllaz a la nueva.
|
| El llïonés tará presente en tolos colexos de la ciudá de Llión |
|
El Conceyeiru d'Educación del Conceyu de Llión, Abel Pardo, informóu a los medios de que nel prósimu cursu escolar 08/09, la llingua llïonesa tará presente cumu asinatura estraescolar en tolos colexos d'esta ciudá. Abel Pardo fizu fincapía en que la esperiencia pilotu desenrrollada durante l'añu 2008 fou un ésitu dafeichu cun tovía más alunos de los asperaos na planificación de l'autividá, motivu pul que l'ensiñu de la nuesa llingua sedrá espardíu al restu de colexos de la capital.
Dende l'Asociación de la Llingua Llïonesa El Fueyu, queremos amosare la nuesa satisfaición pur esta niciativa que de xuru sedrá un pasu bien curiosu na normalización del nuesu idioma ente la xente más nueva.
Enllaz a la nueva en prensa.
|
| Now web on english |
|
El Fueyu offers its contents now in english. To see them just clikc on english button and you can get ost of our web in this language. The excepts are press that it will be in the same language as it was redacted.
If you observe deficiencies or errors in the translation, please, make us to know. Your proposal always will be thanked for.
|
| Descubri un país |
|
La Conceyería de Cultura Llïonesa del Conceyu de Llión, ta acabante de dare nuncia pública de la campaña "Descubri un país" basada en diez escursiones pur tierras llïonesas en cuyu documentu divulgativu la llingua llïonesa tien un papel prioritariu, poru, la nuesa organización quier traslladare las suas felicitaciones y el sou sofitu a dicha conceyería cul envís d'animala a continuare n'esi sen.
|
| Museyu Etnográficu de Riañu |
|
L'Asociación Cultural Montaña de Vadinia, en collaboranza cul Conceyu de Riañu y la Obra Social de Caja España, espubliza un foyetu promocional sobru'l Museyu Etnográficu de Riañu y la sua amuesa de restos arquïolóxicos de vadinienses na zona. Una visita recomendable y necesaria.
|
| I Xornadas Cultura Llïonesa y Deporte |
|
Entamadas pula Conceyería de Cultura Llïonesa del Conceyu de Llión, na xornada de guei escomienzan las I Xornadas Cultura Llïonesa y Deporte cunas que dende'l Palaciu Don Gutierre se rïalizará un averamientu al puxu ya importancia tantu de la nuesa cultura cumu de la tradición deportiva que dende cuantayá abelluga'l pueblu llïonés.
Los autos d'estas xornadas tarán basaos en cuatru conferencias nas que la llingua llïonesa tamién tará presente. Estas conferencias tendrán llugar na presente semana'l llunes, martes, xueves y vienres a las 20,00 horas nel Salón d'Autos del Palaciu Don Gutierre y la primeira correrá a cargu del Conceyeiru de Cultura Llïonesa, Educación y Nuevas Teunoloxías del Conceyu de Llión, Abel Pardo Fernández, na que tamién s'emitirá l'interesante documental sobru la llingua llïonesa "Asina Falamos" de la compañía Armonía Films nel que s'amuesa cun claridá cumu pur tola nuesa provincia la nuesa fala sige teniendu vitalidá y continua siendu usada pur llïoneses de tolas edades na sua vida mas cotidiana.
|
| Conferencia: La Llingua Llïonesa nel sieglu XXI |
La Conceyería de Cultura Tradicional Llïonesa, xunta ComunidáLlïonesa.YE asína cumu la collaboración d'asociaciones en sofitu la llingua cumu El Fueyu, La Barda y El Toralín, entaman un añu más un autu pa cellebrar el Día Internacional de la Llingua Materna cun una conferencia nomada "la Llingua Llïonesa nel sieglu XXI".
L'autu encuádrase dientru una riestra d'autividaes, charlas y debates alrodiu la cultura llïonesa que quier desendolcase dende la conceyería que dirixe Abel Pardo, nos que van aboradase temas tantu de la llingua llïonesa cumu de la cultura llïonesa en xeneral.
L'autu ye'l miércoles, Febreiru y 27, nel Salón d'Autos del Palaciu Don Gutierre de Llión. N'esta mesa redonda participarán: Raúl Sánchez Prieto, Doutor en Filoloxía y mayestru de la Universidá de Salamanca, Abel Pardo Fernández, Conceyeiru d'Educación, Nuevas Teunoloxías y Cultura Tradicional Llïonesa de Llión, Xairu Llópez Xáñez, Diseñador de Páxinas Web y Alicia Valmaseda Merino, Cordinadora de ComunidáLlïonesa.YE
|
| Cursos de Llingua Llïonesa nas escuelas públicas del Ayuntamientu de Llión |
Tras un llargu tiempu de negociaciones y preparativos de planes docentes, los primeiros cursos de llingua llïonesa van dase nos centros escolares de primaria del Ayuntamientu de Llión. Estos cursos, encuadraos na riestra d'autividaes que quier desendolcar el conceyeiru d'Educación, Nuevas Teunoloxías y Cultura Llïonesa, Abel Pardo Fernández, escomienzan cumu esperiencia pilotu dientru de la ufierta d'autividaes estraescolares y gratuitas pa niños n'educación primaria, y sedrá completada cun cultura ya historia llïonesas amás de visitas a llugares d'especial interés rellacionaos cunas materias dadas.
Anque estas clases son pur agora una esperiencia pilotu, lu ciertu ye que los feichos superan nidiamente a las espeutativas, pues si bien quería entamase un solu cursu nún centru cun poucu más de cincu niños, las peticiones pur parte deillos centros asina cumu la más que favorable respuesta d'asociaciones de pais y profesores dionun cumu resultáu que cuasi venti niños y dous entamen dalgu que tendrá un guapu futuru.
cun estos cursos espérase que'l llïonés recupere posiciones na sociedá, purque tal y cumu siñala Pardo "el llïonés ta nuna zona de peligru dientru de la catalogación de la UNESCO, pur detrás del catellán, catalán, bascu, gallegu ou asturianu". Recordemos que sigún The Red Book Of Endangered Languages, el llïonés tien catalogación de "seriously endangered".
Tras los resultaos d'esti primer cursu sedrán perfiladas las cuestiones al respeutive de los conteníos docentes asina cumu necesidaes de formación de profesoráu pal viniente cursu. Una bona noticia, ensin dubia.
(I) (II) (III)
León Noticias
Terra.es
ABC
|
| Cursos de Llingua Llïonesa en Coyanza y Villamañán |
El segundu cursu de llingua llïonesa, entamáu pur El Fueyu, escomienza en Coyanza cun agran acoyida de xente. Esti añu, amás de continuase cunos estudios escomenzaos l'añu pasáu, quier abrise outra vuelta un nuevu plazu de matrículas pa los que quieran averase a la nuesa llingua. Los días d'imaprtición son tolos vienres de 19:00 a 21:00H, na Casa de Cultura de Coyanza.
Igualmente, en Villamañán va desendolcase pur primeira vuelta un cursu d'entamu de lllingua llïonesa, tamién entamáu pur El Fueyu, del que yá hai un bon númberu de presonas que tienen amosáu interés n'asistire.
Pa más información contautar al teléfonu 605343824 (Xuan).
|
| III Cursu de Llingua Llïonesa en Mansiella Las Mulas |
El tercer cursu de llingua llïonesa en Mansiella Las Mulas yá tien abierta la matrícula pa tolos que quieran apuntase al mesmu. Pa los que quieran más información pueden dir a la Casa de Cultura de Mansiella Las Mulas ou chamar al teléfonu 605343824, entrugandu pur Xuan.
|
| II Cursu de Llingua Llïonesa en Zamora entamáu pur El Fueyu |
Un añu más, l'asociación cultural de la llingua llïonesa El Fueyu entama outru cursu de llingua llïonesa na ciudá de Zamora. Esti cursu ta feichu xunta'l Conseyu Llariegu de la Mocedá de Zamora, y collaboran nel mesmu l'Ayuntamientu de Zamora, Conceyería de Mocedá de Zamora, Conceyu Xoven, Asociación Ecoloxista Busgosu y la Fundación Caja Rural.
El cursu entama en xineiru y 19 y finará en mayu y 24, n'horariu de sábados a las tardes Las iscriciones ou información sobru la formación de matrícula podrán facese nel Conseyu Llariegu de Mocedá, asitiáu na primeira planta del edificiu La Alhóndiga (Plaza Santa Ana S/N), 980 50 82 98 ou tamién unviandu un correyu a la viniente direición:
cursoszamora@gmail.com
cuña d'arradiu enas emisoras zamorana d'Onda Cero y Europa FM
|
|
